სავარჯიშო 7.6. – უნდა მივიღოთ მონაწილეობა პოლიტიკაში?

მსვლელობა

1. ოთხი მოსწავლე გაითამაშებს საუბარს ოთხ მოქალაქეს შორის, რომლებიც არც თუ ისე დიდი ხანია, რაც ჩამოვიდნენ ქვეყანაში, რომელიც ჩამოყალიბების პროცესშია.
2. მოსწავლეები, საჭიროების შემთხვევაში მასწავლებლის დახმარებით, განიხილავენ შემდეგ საკითხებს, რომლებიც მოსმენილ საუბართან დაკავშირებით წამოიჭრება:
   • როგორია მოქალაქეთა ძირითადი მოსაზრებები ქვეყნის მართვაში მონაწილეობასთან დაკავშირებით? ეთანხმებით ამ მოსაზრებებს? რატომ?
   • რა მხრივ დაზარალდებიან მოქალაქეები იმ შემთხვევაში, თუ არ მიიღებენ მონაწილეობას? რა სარგებელს ნახავენ ისინი, თუ მიიღებენ მონაწილეობას?
   • რა სარგებელს ნახავს ჩამოყალიბების პროცესში მყოფი ქვეყანა მოქალაქეთა მონაწილეობით?
   • რა შესაძლო რისკები და ზარალია მოსალოდნელი იმ შემთხვევაში, თუ მოქალაქე გადაწყვეტს მონაწილეობას?
   • რისკებისა და სარგებლის გათვალისწინებით, როგორ მიგაჩნიათ, ღირს მონაწილეობა?
3. დისკუსიის გამართვის ან ლექციის მოსმენის შედეგად, მოსწავლეები უნდა მივიდნენ შემდეგ დასკვნამდე:
   ქვეყნის მთავრობა ადამიანების ცხოვრებაზე ბევრნაირად ახდენს გავლენას. ქვეყნის მართვაში მონაწილეობით, მოქალაქეები მოიპოვებენ ხმის უფლებას მთავრობის მიერ გადაწყვეტილების მიღების პროცესში. ნებისმიერ საზოგადოებაში ვიღაცას უწევს გადაწყვეტილების მიღება. თუ მოქალაქეები გადაწყვეტენ, არ მიიღონ მონაწილეობა, ამით ისინი კარგავენ ხმის უფლებას ისეთი გადაწყვეტილებების მიღების პროცესში, რომელიც შეიძლება ეხებოდეს ისეთ საკითხებს, როგორიცაა:
   • მოსახლეობისთვის დაწესებული გადასახადების ოდენობა;
   • ჩაებას თუ არა ქვეყანა ომში;
   • ვის ხელში აღმოჩნდება და ვინ გააკონტროლებს ქვეყნის ბუნებრივ რესურსებს.

იმის მიხედვით, თუ მთავრობის როგორი სტრუქტურა მოქმედებს ქვეყანაში, გადაწყვეტილებების მიღება ხდება სხვადასხვა დონეზე, მათ შორის, ეროვნულ, რეგიონულ და ადგილობრივ დონეებზე. ზოგიერთი გადაწყვეტილების მიღება, როგორიცაა, მაგალითად, სამხედრო ძალაუფლების შესახებ გადაწყვეტილება, ხორციელდება ქვეყნის მასშტაბით, ეროვნულ დონეზე, მაშინ, როცა ტრანსპორტისა და გზების შესახებ გადაწყვეტილების მიღება ხდება რეგიონულ დონეზე. სხვა საკითხები, როგორიცაა, მაგალითად, დასუფთავება, ხშირად ადგილობრივ დონეზე წყდება.

მასალა