გაკვეთილი 4: ძალაუფლების მატრიცა

უმცირესობები და უმრავლესობა  ჩვენს ქვეყანაში

გაკვეთილის აღწერა

მოსწავლეები სხდებიან წრეზე. წრის შუაში საკმაო ადგილი უნდა იყოს დატოვებული, რათა არც ერთი მოსწავლის თვალთახედვის არეალი არ იყოს შეზღუდული.

მასწავლებელი წრის შუაში, იატაკზე ათავსებს ბარათებს, რომლებზეც საზოგადოების სხვადასხვა ჯგუფის სახელწოდება წერია. ამათგან ზოგიერთი ჯგუფი განეკუთვნება უმრავლესობას, ხოლო ზოგიერთი – უმცირესობას. მნიშვნელოვანია, გავითვალისწინოთ, რომ უმცირესობათა ყველა ჯგუფი შეზღუდული ძალაუფლებით არ სარგებლობს საზოგადოებაში!

საზოგადოების სხვადასხვა ჯგუფის სახელწოდებათა მაგალითები:

• ბავშვები;
• უნარშეზღუდულები;
• პოლიტიკოსები;
• განსხვავებული კანის ფერის მქონე ადამიანები;
• პანკები;
• მოციგურავეები;
• ღრმად მორწმუნე ადამიანები, რომლებიც განსაკუთრებულ ტანისამოსს ატარებენ;
• მღვდლები და მონაზვნები;
• მოხუცებულები;
• წარმომავლობითი უმცირესობები, როგორიცაა ბოშები და სხვ.
• მენეჯერები;
• მუშები;
• დიასახლისები;
• ექიმები;
• კაცები;
• ქალები.

მოსწავლეები უნდა დააკვირდნენ ბარათებს. ამის შემდეგ ყოველმა მათგანმა უნდა აიღოს ერთი ბარათი. მოსწავლეებმა ბარათები უნდა აიღონ სათითაოდ და ყოველგვარი კომენტარის გარეშე დაახარისხონ ისინი იმის მიხედვით, მათი აზრით, ბარათზე დასახელებული ჯგუფი უმრავლესობას მიეკუთვნება თუ უმცირესობას. ეს „ძალაუფლების მატრიცის“ შექმნის პირველი ეტაპი იქნება.

მეორე ეტაპზე, მატრიცის შესავსებად საჭიროა თითოეულ ბარათს, როგორც უმრავლესობის ისე უმცირესობის კატეგორიაში, რომელზეც ადამიანთა ჯგუფის სახელწოდებაა დაფიქსირებული, მიუსადაგონ ბარათი, რომელზეც შეფასების სიმბოლოა გამოსახული. მოსწავლეებისათვის საინტერესო აღმოჩენა იქნება ის, რომ უმცირესობებიც შეიძლება ძალიან დიდი გავლენით სარგებლობდნენ საზოგადოებაში.

მატრიცის ნიმუში:

მას შემდეგ, რაც მატრიცა სრულყოფილ სახეს მიიღებს, მოსწავლეები განიხილავენ იმ ეფექტს, რაც ძალაუფლების სხვადასხვა დონეს შეუძლია იქონიოს. მასწავლებელს ამ ეტაპზე ევალება დისკუსიის მართვა და მოსწავლეების მსჯელობაში დაფიქსირებული წინასწარი განწყობისა და კატეგორიული მოსაზრებებისადმი განსაკუთრებული ყურადღებით მოკიდება.